Алматыда Розыбакиев көшесін Шахановтың атына өзгерту керек — петиция

Интернетте Алматыдағы Абдулла Розыбакиев атындағы көшені Мұхтар Шахановтың атына өзгерту туралы петиция жарияланды.

Петиция GosRating.com порталында орналастырылған. Онда Алматы қаласының тұрғындары мен Қазақстан азаматтары ономастикалық комиссияға тиісті ұсыныс жолдаған.

– Құрметті ономастикалық комиссия мүшелері! Біз, Алматы қаласының тұрғындары және Қазақстан Республикасының азаматтары, Абдулла Ахметұлы Розыбакиев атындағы көшені Қазақстанның халық жазушысы, Қазақстанның Еңбек Ері, көрнекті қоғам және мемлекет қайраткері Мұхтар Шахановтың атына өзгерту туралы бастама көтереміз. Ол 2026 жылғы 19 сәуірде дүниеден өтті, – делінген петиция мәтінінде.

Петиция авторлары Мұхтар Шахановты тәуелсіз Қазақстанның жаңа тарихындағы маңызды тұлғалардың бірі ретінде атап өтеді. Олардың айтуынша, оның халық пен мемлекет алдындағы еңбегі айрықша мәнге ие.

– Мұхтар Шаханов 1986 жылғы Желтоқсан оқиғаларын тарихи тұрғыдан ақтауға елеулі үлес қосты, қазақ тілі мен ұлттық егемендікті қорғауда белсенді болды. Сонымен қатар, ол әлемдік деңгейдегі әдеби мұра қалдырды, жоғары мемлекеттік және халықаралық марапаттарға ие болды, – деп атап өткен петиция авторлары.

Сонымен қатар құжатта Абдулла Розыбакиевтің тарихи тұлға ретіндегі орнына құрмет сақталатыны айтылған.

– Біз 1897-1937 жылдары өмір сүрген, 1957 жылы ақталған саяси қуғын-сүргін құрбаны Абдулла Розыбакиевтің есіміне құрметпен қараймыз. Оның есімін басқа форматта ұлықтау мүмкіндігін қарастыру ұсынылады: өмірбаянымен байланысты нысандарға беру, мемориалдық тақта орнату немесе көрнекті тұлғалар аллеясындағы бюстін сақтау, – делінген петицияда.

Петиция авторларының пікірінше, ұзындығы шамамен 7 шақырым болатын, Бостандық және Алмалы аудандарын қиып өтетін, ірі білім беру және қоғамдық нысандар орналасқан Розыбакиев көшесі Мұхтар Шаханов тұлғасының қоғамдық маңызына сай келеді.

– Мұхтар Шахановтың есімін Алматы картасында мәңгілік ету – ол өмірінің елеулі бөлігін өткізген, еңбек еткен және мемлекеттік құрметпен жерленген қала үшін әділ шешім болар еді, – деп есептейді бастама көтергендер.

Мұхтар Шаханов – көрнекті жазушы, ақын, драматург әрі қоғам және саясат қайраткері. Қазақстанның халық жазушысы, Қазақстанның Еңбек Ері. Ол шығармашылық жолын журналистикадан бастап, «Жалын» журналының редакторы болған. КСРО Жоғарғы Кеңесінің және Қазақстан Парламенті Мәжілісінің депутаты қызметін атқарған. 1986 жылғы Желтоқсан оқиғасына байланысты Кремльде сөз сөйлеп, ұлттық мүддені қорғаумен танылды. Сонымен қатар жерді шетелдіктерге жалға беруге қарсы қозғалысты бастап, «Халық рухы» партиясын басқарған.